6parmipedar

Par mî pèdar		Per mio padre
Quásste l’é la poesî ad quänd ai taché a murîr mî pèdar ch’al sré i ûc’ sänze arsponndr a inción ai quâtr ad lói dl ân pasè a basoure mo al stêve mèl da sucuänt dé e a ciaménn al prît e la nòt prémme ai fó cal grän scarvänt col tron vous dal mî magon e l i gêve “a son gnó a purtèrat ind i ûc’ dal Sgnour a váddr i tû da qué e an i é pió gnént da fèr e âmen t î bèle in vátte al óss sänt ch’al dîs al tänp ‘fáirmat’”, e a m insugné mî pèdar ch’al gnêve in só dal dou torr vêrs palâz e l m á détt “andággne?” mé l savêve ch’l êre môrt da pôc änc s’ai êre drî a durmîr e a i o détt ad no col magon parché l îre ló e parché ai o pòre, a sént al Sgnour ch’l um ciâme e l dîs ch’a n pòs bra stèr acsé s’a vói dvintèr cunpâgne ló; e quänd mî pèdar dopp al mî no l é andè d lóng änc un pôc e al s é prilê e l é turnè indrî stramèz ala zänt sänze dîrum gnént a son avanzè lé cunpâgne un patalócc ch’a i son avanzè mèl d aváiri détt ad no.		Questa è la poesia di quando cominciò a morire mio padre che chiuse gli occhi senza rispondere a nessuno il quattro luglio dell’anno scorso nel tardo pomeriggio ma stava male da alcuni giorni e chiamammo il prete e la notte prima ci fu quel gran temporale col tuono voce del mio dolore e gli diceva “sono venuto a portarti negli occhi del Signore a vedere i tuoi cari da qui e non c’è più niente da fare e amen sei già alla soglia dell’uscio santo che dice al tempo ‘fermati’”, e ho sognato mio padre che saliva dalle due torri verso piazza e mi ha detto “andiamo?” io lo sapevo che era morto da poco anche se ero addormentato e gli ho detto di no con dolore perché era lui e perché ho paura, sento il Signore che mi chiama e dice che non posso rimanere così se voglio diventare come lui; e quando mio padre dopo il mio no è andato avanti ancora un po’ e si è girato e poi è tornato indietro in mezzo alla gente senza dirmi niente sono rimasto lì come un patalucco perché ci sono rimasto male d’avergli detto di no.